Bisita

«BISITA»

Uztailaren 6an, osteguna, 19:30ean, Zas Kulturrek (San Anton plaza 2, Gasteiz) «Bisita» izeneko bisita gidatu hirukoitza eskainiko du, gaur egun Zas Kulturren ikus daitezkeen Sofía Velasco, Jesús Ramírez eta Lucía Jayoren erakusketetara.

Bisita gidatuan artista batzuek parte hartuko dute, eta bertaratutakoei sortzaile horien obrak gertutik ezagutzeko eta beren lanetan murgiltzeko aukera emango diete. Bisitak hiru proposamen horiek berraktibatzeko eta haien balioa berriro nabarmentzeko ere balioko du.

Ibilbidean, bisitariek Sofía Velasco, Jesús Ramirez eta Lucía Jayoren obra-hautaketa batez gozatu ahal izango dute. Tokiko hiru artista emergente dira eta, gazteak izan arren, bakoitzak berezko hizkuntza pertsonala du.

Sofía Velascoren «Me digo bien» esku-hartzea Zas Kulturren erakusleihoan egiten da, eta «txerri baten historia» irudikatzen du: animalia arrosa baten inguruan lan egiten du, hainbat material eta sorkuntzaren bidez, eta «forma geometriko dibertigarriak» ere erabiltzen ditu. Horrela, hainbat kontakizun planteatzen dituen ipuin bat sortzen da, erakusketa bat zer den ulertzeko ditugun eskemetatik aterarazi nahi gaituena. Artistaren hitzetan: «Erakusketak artistak egindako testu hau du lagun: “Esaten diot neure buruari, zerbait jarriko dut hor. Baina, orduan, jarraitzen dut, jakina! bitrina bat da, ez horma bat. Nola egin horma batean zegoen zerbait eroso egon dadin hemen, geometria honetan? Ez baita gauza bera areto batean sartu eta ikustea, edo arrainontzi batera hurbildu eta ikustea. Ikuspuntua eta tamaina erlatiboa aldatzen dira. Barrutik ikustea edo kanpotik ikustea…”»

Jesús Ramírezen «Imprecisiones» erakusketak familia-dokumentuek, batez ere argazkiek, eragiten dioten lilura sakonean murgiltzera gonbidatzen gaitu. Aurkitutako artxibo txiki batekiko interes pertsonaletik sortutako proiektua da: familia-dokumentuek osatzen dute, batez ere ezezagunen argazkiek, eta marrazki-proposamenen bidez garatzen da. Bere lan obsesiboa familia-memoria sortzen eta zaintzen duten praktikak zalantzan jartzeko interes kontzeptualaren barruan kokatzen da, haren etorkizunari buruz espekulatzen duen bitartean. «Etxekotu» kontzeptua eta animalia basatiekin lotutako definizioak interesatzen zaizkio: pertsonekin bizitzera ohitzea, aginduak betetzen irakastea, haien basakeria murriztea eta tratagarri bihurtzea. Aurkitutako artxibo txiki batekiko interes pertsonaletik sortutako proiektua da, familia-dokumentuez osatua, batez ere ezezagunen argazkiez, eta marrazki-proposamenen bidez garatzen da.

Azkenik, Lucía Jayo artista gasteiztar gaztearen «Gris Grass» erakusketak irudi neutralak eta erraz ezagutzeko modukoak aztertzen ditu, hala nola galtza batzuk, zuhaitz bat edo paisaia bat. Haien antzekotasunen nahiz sor daitezkeen interpretazioen bidez harremanak ezartzea du helburu, publikoari ezaguna dena hautemateko moduaz hausnartzeko eta hura zalantzan jartzeko gonbidapena eginez. Horrela, ezaguna dena hautemateko moduaz hausnartzera eta hura zalantzan jartzera gonbidatzen du publikoa, eta irudi horiek ikusizko pista-segida bat sortzen duten funtsezko elementu bihurtzen ditu. Berak dioenez, «Gris Grass aukera guztien hasieran dagoen eremu zabal eta eskuragarria da».

Sofía Velasco, Jesús Ramírez eta Lucía Jayoren erakusketetarako bisita gidatua doakoa izango da, eta 2023ko uztailaren 6an, osteguna, egingo da Zas Kulturren, 19:30etik aurrera. Sarrera librea izango da, edukiera bete arte.